Кожная пара года прыгожая па-свойму. Восень прывабная рознакаляровасцю фарбаў, няўстойлівасцю надвор’я. Акрамя таго, гэта пара, калі арганізм чалавека патрабуе асаблівай увагі да сябе, у тым ліку — і ўмеранай фізічнай нагрузкі. Мелі рацыю тыя, хто, адклаўшы ўсе свае штодзённыя справы, прынялі ўдзел у фізкультурна-аздараўленчым свяце “Залатая восень” для працоўных калектываў арганізацый раёна, якое прайшло на стадыёне райцэнтра.
На здымку: Удзельнікі спаборніцтваў з каманды-пераможцы з СВК «Рассвет» імя К.П.Арлоўскага.
У праграму свята ўвайшлі спаборніцтвы па пяці відах спорту: лёгкай атлетыцы, стральбе з пнеўматычнай вінтоўкі, дартсе, гіравым спорце і перацягванні каната. На жаль, толькі 9 арганізацый раёна прадставілі свае каманды для ўдзелу ў спаборніцтвах: СВК “Рассвет” імя К.П.Арлоўскага і “Добасна-агра”, ААТ “Кіраўск-Лён”, УКП “Жылкамгас”, райагра-прамтэхзабеспячэнне, райспажыўтаварыства, раённы вузел электрасувязі, Жыліцкі сельгаскаледж і ліцэй №15.
Палажэнне спаборніцтваў прадугледжвала ўдзел у іх усіх членаў каманд, а гэта 8 спартсменаў і 1 прадстаўнік. Зразумела, барацьба была сур’ёзная, але ў спорце, як на вайне, перамагае мацнейшы. Так, увесь п’едэстал гонару ў лёгкай атлетыцы захапілі рассветаўцы і жылічане: Яўген Манько з “Рассвета” і Кацярына Кедзіч з сельгаскаледжа — пераможцы, на другім месцы — жылічанін Юрый Лаеўскі і рассветаўка Вера Гаўрылава, на трэцім — рассветаўцы Аляксей Бычкоў і Кацярына Якаўлева.
Самымі трапнымі ў стральбе з пнеўматычнай вінтоўкі сталі Сяргей Сямёнаў (УКП “Жылкамгас”) і Наталля Шапавалава (“Рассвет”), другія месцы заваявалі Уладзімір Самусеў (ліцэй №15) і Нініко Гагохія (СВК “Добасна-агра”), трэція — Яўген Пішчалін (“Рассвет”) і Вікторыя Пятруша (ААТ “Кіраўск-Лён”).
У дартсе Уладзіміру Самусеву пашанцавала больш, ён стаў пераможцам, сярод жанчын самай трапнай была Аксана Горбель (РВЭС), Яўген Малахоўскі і Вікторыя Пятруша (ААТ “Кіраўск-Лён”) і Дзмітрый Юрчанка райаграпрамтэхзабеспячэнне) і Наталля Шапавалава занялі адпаведна другія і трэція месцы.
У гіравым спорце змагаліся толькі мужчыны. У вагавай катэгорыі да 80 кг самым моцным быў Арцём Сідарэнка з сельгаскаледжа, уступіў яму ліцэіст Дзяніс Петрусёў, Яўген Пішчалін стаў трэцім. У вагавай катэгорыі звыш 80 кг пераможцам стаў зноў жа прадстаўнік каманды сельгаскаледжа Андрэй Семенчукоў, на другім месцы — рассветавец Сяргей Шырокі, на трэцім — Васіль Сямёнаў з ААТ “Кіраўск-Лён”.
У перацягванні каната мацнейшай аказалася дружная каманда СВК “Рассвет” імя К.П.Арлоўскага. На другім месцы — каманда ААТ “Кіраўск-Лён”. Такім жа чынам размеркаваліся і месцы ў агульнакамандным заліку. Тройку прызёраў замкнула каманда ліцэя №15.
Пераможцы і прызёры ў камандным заліку былі ўзнагароджаны каштоўнымі падарункамі аддзела фізічнай культуры, спорту і турызму райвыканкама, а ў асабістым — дыпломамі фізкультурна-спартыўнага клуба раёна.
— Свята ўдалося, нават не зусім цёплае надвор’е не сапсавала настрой яго ўдзельнікам, хоць і прымусіла пахвалявацца.
Упэўнены, — гаворыць начальнік аддзела фізічнай культуры, спорту і турызму райвыканкама Сяргей Гаўрылаў, хто правёў суботні дзень з намі на стадыёне, не пашкадаваў. Праўда, прадстаўніцтва арганізацый было не вялікім. Мяркую, гэтаму ёсць сваё тлумачэнне. Калі б кіраўнікі працоўных калектываў на ўласным прыкладзе дэманстравалі адносіны да фізкультуры і, перш за ўсё, да ўласнага здароўя, то і спаборніцтвы былі б куды больш масавымі і цікавымі.
Галіна РУСЕЦКАЯ.