Падчас правядзення Адзінага дня інфармавання на МТК “Барчыцы” КСУП “Барчыцы-агра” з жывёлаводамі комплесу сустрэлася інфармацыйна-прапагандысцкая група на чале са старшынёй раённага Савета дэпутатаў Галінай Слабоднікавай, якая і задала тон размове. Яна акрэсліла асноўныя тэмы, вынесеныя для абмеркавання, і датычацца здароўя нацыі, страхавання ад няшчасных выпадкаў на вытворчасці і бяспекі жыццядзейнасці ў зімовы перыяд, а таксама спынілася на праблемах, якія ўзнікаюць з-за парушэння грамадзянамі элементарных правілаў. І каб не было позна, трэба пастаянна задумвацца над дзеяннямі, якія адбываюцца з-за абыякавасці і неабдуманых учынкаў.

Асноўную тэму Адзінага дня інфармавання “Здароўе нацыі — вышэйшая каштоўнасць дзяржавы. Меры па папярэджванні і пераадоленні п’янства і алкагалізму ў Беларусі” асвятліла ўрач-тэрапеўт райбальніцы Галіна Бурван. Яна падкрэсліла, што на дыспансерным уліку ва ўрача-нарколага знаходзіцца 611 грамадзян, у тым ліку 147 жанчын і 113 непаўналетніх. За 10 месяцаў бягучага года ў раёне зарэгістраваны 1 смяротны выпадак ад алкагалізму (летась — 3), у прыёмнае аддзяленне райбальніцы ў п’яным выглядзе было дастаўлена 39 чалавек (у 2015 — 51).
Таксама было адзначана, што ў раёне пражываюць 55 сем’яў, у якіх дзеці знаходзяцца ў сацыяльна-небяспечных умовах. 90% гэтых сем’яў састаяць на ўліку ў камісіі па справах непаўналетніх райвыканкама па прычыне ўжывання алкаголю абодвума бацькамі. У адпаведнасці з Дэкрэтам №18 “Аб дадатковых мерах па дзяржаўнай абароне дзяцей у сацыяльна няўдачных сем’ях” нера-дзівых татаў і мам прымушаюць працаваць, каб вяртаць сродкі, затрачаныя дзяржавай на ўтрыманне іх дзяцей. Дарэчы, маюцца такія абавязаныя асобы і ў КСУП “Барчыцы-агра”.
Як праінфармавала прысутных дырэктар раённага прадстаўніцтва Белдзяржстраху Ірына Таркан, у бягучым годзе на Кіраўшчыне адбылося 4 няшчасныя выпадкі на вытворчасці, з іх 1 — з цяжкімі вынікамі, 1 — са смяротным зыходам. Яна таксама адзначыла, што з 1 студзеня 2004 года ў рэспубліцы дзейнічае абавязковае страхаванне ад няшчасных выпадкаў на вытворчасці і прафесійных захворванняў, якое забяспечвае эканамічныя інтарэсы работнікаў і членаў іх сем’яў у выніку няшчаснага выпадку. У раёне такія выплаты атрымліваюць 54 чалавекі, за 10 месяцаў бягучага года ў цэлым ім выдаткавана 129 тыс. руб.
Аб сітуацыі з пажарамі ў рэспубліцы і раёне, правілах паводзін на лёдзе, бяспечным выкарыстанні петардаў расказаў старшы інспектар РАНС Максім Антоненка. Ён нагадаў прысутным аб неабходнасці ўтрымання пячнога ацяплення ў спраўным стане, своечасовай ачыстцы дыхамодаў, устаноўкі ў жылых памяшканнях аўтаномных пажарных апавяшчальнікаў і замены элементаў сілкавання ў іх.
Затым Галіна Слабоднікава адзначыла, што ў адпаведнасці з Указам Прэзідэнта Рэспублікі Беларусь ад 4.07.2016 года №253 “Аб мерах па фінансавым аздараўленні сельгасарганізацый” у нашым раёне працягваецца работа па папярэджванні банкруцтва такіх гаспадарак, як КСУП “Барчыцы-агра” і “Чырвоны баец”, ААТ “Стайкаўскае”.
Увага прысутных была звернута на тое, што вы-праўленне эканамічнай сітуацыі ў іх і ў іншых сельгасарганізацыях залежыць ад многіх фактараў, у тым ліку і ад добрасумленнага і адказнага стаўлення да выканання даручанай справы кожнага члена калектыву, захавання імі працоўнай дысцыпліны.
Падчас сустрэчы сяльчане выказалі пажаданне, каб у іх аграгарадку аказваліся бытавыя паслугі. Часам у многіх жыхароў няма магчымасці, каб з’ездзіць у райцэнтр і набыць рытуальныя прыналежнасці, наведацца ў цырульню. Вырашэнне дадзенага пытання ўзята на кантроль.
У ходзе Адзінага дня інфармавання інфармацыйна-прапагандысцкія групы райвыканкама правялі сустрэчы ў працоўных калектывах ДРБУ-197, УКП “Жылкамгас”, РДК, РЦСАН, ЦДАДіМ, з жыхарамі аг.Стайкі і аг.Паўлавічы. Прысутныя мелі магчымасць задаць цікавячыя іх пытанні і атрымаць адказы.
Таццяна БАРАДЗІНА.
Фота Максіма МІКЕШЫНА.