Самая буйная гаспадарка раёна — ААТ “Рассвет імя К.П.Арлоўскага” зноў у лідарах раённага спаборніцтва: на гэты раз — па выніках веснавых палявых работ. Гэта і заканамерна: грунтоўна падрыхтаваная і паспяхова праведзеная пасяўная кампанія гарантавала атрыманне высокага ўраджаю і першынства па выніках раённага спаборніцтва на жніве-2017.

Увогуле зробленае ў бягучым сельска­гаспадарчым годзе рассветаўцы ацанілі на ўрачыстым мерапрыемстве, прысвечаным Дню работнікаў сельскай гаспадаркі і перапрацоўчай прамысловасці.
У сваім выступленні дырэктар акцыянернага таварыства Аляксандр Багель асабліва падкрэсліў значэнне пераемнасці працоўных традыцый, закладзеных у свой час кіраўнікамі гаспадаркі К.П.Арлоўскім, В.К.Старавойтавым, і адзначыў, што сёлета калектыў “Рассвета”, як заўжды, працаваў з поўнай самааддачай, адказна і добрасумленна, з захаваннем усіх тэхналагічных патрабаванняў. Сведчанне таму — дасягнутыя рэзультаты, лідарства ў раёне.
Кіраўнік коратка ахарактарызаваў работу розных галін таварыства: здабыткі і пазіцыі, на якія трэба звярнуць увагу.
Валавы збор збожжавых у вазе пасля дапрацоўкі склаў 15576 т (2016 г. — 12196 т): як бачна, рассветаўцы пераўзышлі леташні рубеж. Ганарова, што ў мінулым і бягучым гадах менавіта экіпаж збожжаўборачнага камбайна “Рассвета” ў саставе Івана Салановіча і Івана Багеля быў першым тысячнікам Магілёўшчыны. І першыя вадзіцелі, якія адвезлі тысячу тон збожжа — таксама з іх калектыву: Аляксандр Бабіч і Генадзь Гукаў.
Былі агучаны рэзультаты ўборкі іншых сельгаскультур. Валавы збор бульбы склаў 6640 т. Цукровых буракоў атрымалі на 5855 т больш леташняга пры ўраджайнасці 440 ц/га. Прыбыткова спрацавалі па агародніне закрытага грунту, нядрэнным быў ураджай цыбулі. На жаль, з-за неспрыяльных пагодных умоў недабралі яблыкаў да ўзроўню мінулага года.
У гаспадарцы значная ўвага надаецца захаванню вырашчанага: працуюць 5 агароднінасховішчаў, праз рукі іх работнікаў праходзіць каля 7 тыс. т агародніны.
Дырэктар акцыянернага таварыства падкрэсліў, што асноўнай галіной застаецца жывёлагадоўля. Для ўтрымання грамадскага статка БРЖ у гэтым годзе нарыхтавана 42380 т кармавых адзінак, на адну ўмоўную галаву — 6,8 т к.адз. Як канстатаваў Аляксандр Багель, адна з галоўных задач, якая стаяла перад імі ў перыяд корманарыхтоўкі, — забяспечыць добрую якасць кармоў, як важнейшага складаемага стабільна высокіх паказчыкаў па малаку і мясу, — выканана.
За 9 месяцаў у гаспадарцы атрымана 10840 т малака, што вышэй адпаведнага мінулагодняга паказчыка на 199 т. Паказчык рэнтабельнасці вытворчасці малака ў “Рассвеце” — самы высокі ў раёне: за 9 месяцаў ён склаў 44,7%.
Для далейшага руху наперад яшчэ маюцца рэзервы, якія неабходна задзейнічаць, і спецыялісты над гэтым працуюць. Для стымулявання павышэння аб’ёмаў вытворчасці і рэалізацыі малака выкарыстоўваюцца прэміяльныя выплаты работнікам.
Сёлета ўведзена ў эксплуатацыю памяшканне для ўтрымання цялят да 90 дзён на 180 галоў на МТК “Кірава”, у гэтую будоўлю інвестыравана 154 тыс. руб. Тут захаванасць цялят дасягнула 99%. Удзячнасць за руплівую працу Аляксандр Багель выказаў Таццяне Чарновай, Наталлі Тарэлка, Галіне Шлапаковай і іх кіраўніку Любові Шчэрбіч.
Вытворчыя плошчы ў галіне жывёлагадоўлі пашыраюцца: будуецца новая сучасная малочна-таварная ферма, што безумоўна, паўплывае на рост малочнай прадукцыі.
Ішла размова пра работу такога значнага аб’екта, як біягазавая ўстаноўка. Выпрацоўка электраэнергіі за 10 месяцаў склала 19,1 кВт/г, выручка — 6,7 млн. руб. Рэалізацыя мер па павышэнні эфектыўнасці работы ўстаноўкі працягваецца.
Аляксандр Багель закрануў іншыя аспекты работы гаспадаркі, адзначыў уклад кіраўнікоў падраздзяленняў, спецыялістаў, іншых работнікаў у агульную скарбонку “Рассвета”, падзякаваў ім за адданасць сваёй справе, прафесіяналізм, любоў да роднай зямлі. Многія ў гэты дзень атрымалі ўзнагароды ад дырэкцыі.
Шчыра павіншавала рассветаўцаў з надыходзячым святам намеснік старшыні райвыканкама Таццяна Русецкая: за шматгадовую плённую працу была аб’яўлена Падзяка райвыканкама галоўнаму эканамісту Ірыне Бяляўскай, намесніку галоўнага бухгалтара Жанне Цмыг, загадчыцы пашывачнага цэха Валянціне Агеенка.
Шмат шчырых слоў выказаў у адрас рассветаўцаў старшыня райкама прафсаю­за работнікаў АПК Віктар Ставер і ўручыў узнагароды.
Музычныя падарункі прысутныя атрымалі ад вядомых творчых калектываў і выканаўцаў з Бабруйска.
Наталля ХАДАКОВА.