На працягу некалькіх гадоў калектыў ААТ «ПМК-97 «Вадбуд», які ўзначальвае дырэктар Аляксандр Казека, актыўна працуе ў галіне меліярацыі, будаўніцтва і рэканструкцыі водных збудаванняў у раёне. Дзякуючы самаадданай працы работнікаў гэтага прадпрыемства, землі раёна адраджаюцца, становяцца ўсё больш прадуктыўнымі і прыдатнымі для сельскагаспадарчага выкарыстання.

Сярод арганізацый прамысловасці, будаўніцтва, дарожнага будаўніцтва, транспарту, гандлю, сувязі і сферы абслугоўвання раёна калектыў меліяратараў прызнаны лепшым па выніках работы за 2024 год.
У арганізацыі працуе 56 чалавек, кожны з якіх штодзень укладвае сілы і веды ў правядзенне культуртэхнічных мерапрыемстваў на меліярацыйных сістэмах Кіраўскага раёна і іншых рэгіёнаў Прыдняпроўя. Меліяратары займаюцца будаўніцтвам будынкаў і водных збудаванняў, рамонтам і рэканструкцыяй існуючых сістэм, а таксама тэхнічным абслугоўваннем меліярацыйных комплексаў.
Мінулы год стаў паспяховым для ААТ «ПМК-97 «Вадбуд». Аб’ём выкананых падрадных работ значна вырас, склаў 153,3% да ўзроўню папярэдняга года. Будаўніцтва водных збудаванняў павялічылася і склала 148,3%, а ўвод у эксплуатацыю новых аб’ектаў меліярацыі – 159,3%. Гэтыя паказчыкі сведчаць аб высокім узроўні прафесіяналізму каманды і яе значным укладзе ў развіццё рэгіёну.
Рост аб’ёму выкананых работ станоўча адбіўся і на дабрабыце работнікаў. Сярэднямесячная заработная плата павялічылася да ўзроўню 132 % і дасягнула 2122,6 тыс. беларускіх рублёў. Гэтае значнае паляпшэнне ўмоў працы стымулюе работнікаў працягваць працаваць з поўнай аддачай. Высокі ўзровень прадукцыйнасці і якасць выкананых работ забяспечваюцца дзякуючы сучаснай тэхніцы, якая знаходзіцца ў распараджэнні прадпрыемства. ААТ «ПМК-97 «Вадбуд» мае ўсё неабходнае абсталяванне для выканання складаных задач, звязаных з меліярацыяй зямель і будаўніцтвам гідратэхнічных збудаванняў.
З прадстаўнікамі калектыву Вадбуда мы сустрэліся паблізу вёскі Новы Гарадок, дзе праводзіцца рэканструкцыя драўняна-хмызняковай расліннасці на меліярацыйнай сістэме «Рака Добасна». Майстар Аляксей Пась падкрэсліў важнасць пастаяннага догляду за зямлёй, бо менавіта ад гэтага залежыць яе ўрадлівасць. Ён таксама адзначыў, што ў калектыве паспяхова спалучаюцца вопыт спецыялістаў старэйшага ўзросту і энтузіязм маладых кадраў, што стварае спрыяльную атмасферу для прафесійнага росту і развіцця.
Яўгенія БЯЛЬКО.
Фота аўтара.