Прыемны сюрпрыз чакаў вучаніцу Мышкавіцкай СШ Ганну Бяляўскую напярэдадні новага навучальнага года. Яе разам з маці запрасілі на сустрэчу з намеснікам старшыні Пастаяннай камісіі Савета Рэспублікі Нацыянальнага сходу Рэспублікі Беларусь, дырэктарам ААТ “Рассвет імя К.П.Арлоўскага” Аляксандрам Багелем.

Аня пераходзіць у 5 клас, у школе характарызуецца станоўча. За такі кароткі тэрмін навучання дзяўчынка паспела праявіць свае лепшыя якасці, творчыя і спартыўныя здольнасці. А яшчэ, яе маці Ірына Мікалаеўна працуе ў таварыстве агароднікам, і дзядуля Мікалай Мікалаевіч Бяляўскі адпрацаваў у “Рассвеце” больш за 40 гадоў. Менавіта таму Аляксандр Іванавіч вырашыў павіншаваць яе з пачаткам новага навучальнага года, пажадаў далейшых творчых поспехаў, добрай вучобы, пацікавіўся яе планамі на прафесійнае будучае. А яго, дарэчы, Аня ўжо праглядвае, праўда, пакуль бачыць сябе ў некалькіх прафесіях, адна з якіх – настаўнік.

Пасля шчырай размовы Аляксандр Багель падарыў Ганне школьныя прыналежнасці.
Вучаніца прымала падарункі і ад прафсаюзнага камітэта ААТ “Рассвет імя К.П.Арлоўскага”, якія з цёплымі словамі віншавання з новым навучальным годам і пажаданнямі здароўя і поспехаў у вучобе і творчай дзейнасці ўручыла старшыня прафкама Святлана Акуліч.