У рэгіёне працягваецца збор ураджаю. На палетках актыўна вядзецца ўборка агародніны, частка якой фарміруе стабілізацыйны фонд, запасы на міжсезонне. Па інфармацыі камітэта па сельскай гаспадарцы і харчаванні Магілёўскага аблвыканкама, гэтай восенню ў Магілёўскай вобласці плануецца закласці ў стабфонд больш за 12,1 тысячы тон садавінагароднінай прадукцыі – бульбы, капусты, яблыкаў, морквы, буракоў, рэпчатай цыбулі. Удзел у закладцы прымаюць некалькі сельскагаспадарчых арганізацый вобласці і сялянска-фермерскіх гаспадарак, у тым ліку ААТ “Рассвет імя К.П.Арлоўскага”.

На мінулым тыдні ў сельгаставарыстве стартавала ўборка ўраджаю капусты. Тое, як наладжаны гэты працэс, мы ўбачылі на свае вочы, наведаўшы рассветаўскае капуснае поле ў пятніцу.
Сёлета пад гэтую культуру было адведзена 15 гектараў: адзін – пад раннія і сярэднія гатункі, якія ўжо сабралі, і 14 – пад познія. З позніх гатункаў вырошчваюцца “Старыдор”, “Эпікур” і “Лексікон”. Аграном гаспадаркі Іван Фядотаў адзначыў, што гэтыя тры гатункі ў “Рассвеце” вырошчваюць ужо не адзін сезон, для ўмоў надвор’я ў нашых шыротах яны ідэальныя. Самому Івану Аляксандравічу падабаецца гатунак «Лексікон»: шчыльныя, роўныя качаны, вагой па 3,5-4 кілаграмы. Капуста гэтага гатунку добра захоўваецца і мае прыемны смак, без горычы.

Працэс уборкі вядзецца выключна ўручную. Саспелыя качаны зразаюць нажом, адразу сартыруюць і ўкладваюць у кантэйнеры, якія з поля адвозяць у сховішча для захоўвання садавіны і агародніны. Да слова, агароднінасховішча разлічана на 11 тысяч тон прадукцыі.

Ірына Бяляўская працуе ў брыгадзе агароднікаў “Рассвета” больш за 10 гадоў, яе напарніца Святлана Бацюня – другі год. Жанчыны адзначылі, што зараз стаяць добрыя пагодлівыя дзянькі –
працаваць прыемна!

“Мінусавых тэмператур пакуль што няма, капуста на палетках адчувае сябе добра. Гадзін з дзевяці раніцы мы ўжо на полі. У дзень убіраем, прыкладна, гектар. Таму на працягу двух тыдняў уборку завяршым”, – расказала Ірына Мікалаеўна.

У працэсе ўборкі капусты задзейнічана 50 працаўнікоў, большая частка з якіх – рассветаўцы. Ім дапамагаюць 14 чалавек з ліку часова беспрацоўных, накіраваных сюды ўпраўленнем па працы, занятасці і сацыяльнай абароне райвыканкама.

Частка сабранага ўраджаю адразу адпускаецца на рэалізацыю ў гандлёвую сетку гаспадаркі, частка будзе закладзена ў стабфонд. Іван Фядотаў расказаў, што сёлета з аднаго гектара збіраюць у сярэднім па 530 цэнтнераў капусты. Па яго словах, гэта нядрэнная ўраджайнасць, але бывалі і лепшыя.

“Працэс вырошчвання капусты шматэтапны. Спачатку ў цяплічным камбінаце гадуем рассаду, – рассказаў Іван Аляксандравіч. – Затым высаджваем яе на палеткі. Апрацоўваем ад шкоднікаў, праполваем. На кожным этапе могуць чакаць сюрпрызы. Калі казаць пра чалавечы фактар, то тут у нас усё адпрацавана да аўтаматызму, не першы ж год рассветаўцы ў гэтай тэме. А вось надвор’е непрадказальнае. Сёлета спачатку нас напаткалі праліўныя дажджы, потым на працягу доўгага часу панавала спёка. І калі капуста больш менш вытрымала, то іншыя агародніныя культуры значна пацярпелі, што ў выніку адбілася на ўраджаі”.

Больш за ўсё “дасталася” рэпчатай цыбулі. З 70 гектараў, якія яна займала, рассветаўцам удалося сабраць каля 1200 тон. Па словах Івана Фядотава, гэта значна горш, чым некалькі папярэдніх гадоў. “Зачапіла” таксама і моркву. Удала ва ўмовах сёлетняга надвор’я выстаялі цукровыя буракі, якія займалі 10 гектараў. Атрымалі ўраджайнасць гэтай культуры – 510 цэнтнераў з гектара – лепш за леташні паказчык.

Цыбуля, морква, цукровыя буракі ўжо поўнасцю ўбраны з палеткаў.

Вытворчасцю агародніны ў ААТ “Рассвет імя К.П.Арлоўскага” Іван Фядотаў займаецца каля дзесяці гадоў. Да назапашанага прафесійнага вопыту дадаецца яго жыццёвая актыўнасць, энергічнасць і неабыякавасць да даручанай справы. Родам Іван Аляксандравіч з Рагачова. Шляхі прывялі яго ў “Рассвет” у якасці маладога спецыяліста – па размеркаванні пасля заканчэння Беларускай дзяржаўнай сельскагаспадарчай акадэміі. Пасля непрацяглага перыяду работы Івана прызвалі на службу ў армію, аддаўшы абавязак Айчыне, ён вярнуўся ў “Рассвет”. Кажа, не бачыў для сябе найбольш спрыяльных умоў для працы і прафесійнага развіцця ў іншым месцы, таму і вярнуўся.
Агародніну ААТ “Рассвет імя К.П.Арлоўскага” можна бачыць у фірмовай гандлёвай сетцы і на восеньскіх кірмашах.

Яўгенія БЯЛЬКО. Фота аўтара.