Шчырая, душэўная атмасфера панавала ў зале раённага Дома культуры падчас святочнага канцэрта-віншавання “Цеплыня сэрцаў — для самых мілых, дарагіх!”, прысвечанага Дню маці, якая поўнасцю адпавядала гэтай назве. Для віноўніц урачыстасці гучалі віншаванні, музычныя, вершаваныя прывітанні, выконваліся харэаграфічныя кампазіцыі, ім уручалі падарункі, кветкі… Тон ва ўсім задавала цудоўнае трыо вядучых у саставе настаўніка гарадской дзіцячай школы мастацтваў Сяргея Лаўрыненкі і яго выхаванцаў Антона Сакадынца і Мікіты Гушчына.

Віншаванні з Днём маці, Пакровам Прасвятой Багаро­дзіцы выказала старшыня раённага Савета дэпутатаў Галіна Слабоднікава. Яна адзначыла, што гэты дзень адпавядае лепшым традыцыям адносін беларусаў да мацярынства, аб’ядноўвае ўсе слаі беларускага грамадства на ідэях дабрыні, любові і шанавання жанчыны-маці.
У Дзень маці ёсць цудоўная нагода выказаць мамам словы шчырага захаплення і ўдзячнасці за ўменне спалу­чаць прафесійную дзейнасць з выкананнем свайго галоўнага прызначэння быць захавальніцамі дамашняга ачага, традыцыйных маральных каштоўнасцей і ўстояў, нараджаць і выхоўваць сыноў і дочак.
У рэспубліцы, адзначыла Галіна Паўлаўна, прымаюцца меры, накіраваныя на ўзмацненне сацыяльна-эканамічнай падтрымкі сем’яў у сувязі з нараджэннем і выхаваннем дзяцей, умацаваннем духоўна-маральных асноў сям’і, адраджэнне і прапаганду сямейных каштоўнасцей і традыцый. Яна назвала шэраг прадугледжаных для жанчын, маючых дзяцей, гарантый, заканадаўчых мер, падкрэсліла, што пытанні аховы мацярынства і дзяцінства, усебаковай дапамогі маладым і мнага­дзетным сем’ям з’яўляюцца прыярытэтнымі ў дзейнасці выканаўчай улады раёна. Робіцца шмат, каб жанчыны маглі выгадаваць і выхаваць здаровых і шчаслівых дзяцей.
Добрасумленнае выкананне мацярынскага абавязку не застаецца без клопату і ўвагі. Высокай узнагароды ордэна Маці ў раёне ўдастоена 31 жанчына, трое з іх нарадзілі па 10 дзяцей.
Наступная старонка святочнай праграмы была прысвечана мнагадзетным мамам. Зараз іх у раёне 256, у сем’ях якіх выхоўваецца 827 дзяцей.
Пасведчанні мнагадзетных сем’яў і каштоўныя падарункі былі ўручаны Святлане Нявінскай і Алене Судковай.
Цёплыя словы прагучалі ў адрас прысутных мнагадзетных мам Іны Іваніцкай, Вольгі Бегуновай, Вольгі Калабухінай, Аксаны Навіцкай, Кацярыны Фядотавай, якіх запрасілі на сцэну для ўручэння падарункаў.
Далей ушаноўвалі мэтанакіраваных і ўпэўненых у сабе жанчын, якія паспяхова сумяшчаюць работу і клопаты матуль. Яны адказвалі на пытанне, як спраўляюцца з выхаваннем дзяцей і хатнімі клопатамі.
У цэнтры ўвагі былі і жанчыны, якія ўпершыню зведалі радасць мацярынства: такіх у раёне 32. А ўвогуле сёлета на Кіраўшчыне нарадзілася 129 дзетак.
На сцэну запрасілі маладых мам, якія прымаюць актыўны ўдзел у грамадскім жыцці раёна.
Кранальным і вясёлым, выклікаўшым шмат радасных эмоцый і ўсмешак, было выс­туп­ленне выхаванцаў дзіцячага садка №4 са словамі прызнанняў у любові сваім мамачкам. Але доказы гэтага прыводзіліся своеасаблівыя, напрыклад: “А я ей подарок готовлю — на папином новом авто царапаю: “Маме с любовью! Тебя не заменит никто!”…
Быў таксама паказаны відэаролік, дзе старшакласнікі тэлефанавалі сваім мамам з прызнаннямі ў любові, вось толькі на другім канцы тэлефона нярэдка гучалі пытанні: “Ты нічога не нарабіла?”, “Што атрымала ў школе?”.
Таму, як адзначалася ў хо­дзе праграмы, трэба часцей гаварыць матулям добрыя, удзячныя словы, каб для іх гэта было звыкла.
Шчодрымі апладысментамі сустрэлі гледачы маці з дзецьмі, якія паспяхова вучацца, дасягнулі перамог на алімпіядах, конкурсах, фестывалях. Па праву словы ўдзячнасці і сувеніры прымалі іх мамы Наталля Хацкевіч, Таццяна Пашкоўская, Надзея Урбановіч, Таццяна Арцюхова, Віталія Балахніна, Таццяна Арэшка, Таццяна Арлоўская, Алена Ананіч, Ірына Бяляўская, Валянціна Котава.
Віншаванні і пажаданні жанчынам на працягу вечара выказвалі старшыня раённай арганізацыі РГА “Белая Русь” Васіль Маркевіч, старшыня раённага аб’яднання прафсаюзаў Алена Глекава, старшыня райкама прафсаюза работнікаў аграпрамысловага комплексу Віктар Ставер і ўручалі падарункі.
Музычныя віншаванні былі ад самадзейных артыстаў раёна, дзіцячых калектываў.
На завяршэнне на сцэну быў вынесены кошык з кветкамі для ўсіх маці Кіраўшчыны ад райвыканкама.
Наталля ХАДАКОВА. Фота Максіма МІКЕШЫНА.