У Кіраўску прайшла традыцыйная “Навагодняя міля-2017”
У мінулую пятніцу аматары бегу зноў сабраліся каля галоўнай ёлкі раёна на плошчы імя Кірава. Трэба адзначыць, што атрымаліся спаборніцтвы масавымі: усяго да ўдзелу ў забегах запісалася каля сотні чалавек — прадстаўнікоў навучальных устаноў, арганізацый і прадпрыемстваў раёна. Нямала прыйшло і балельшчыкаў, каб “пахварэць” за родзічаў, сяброў ці знаёмых.
Прабег праводзіўся ў васьмі ўзроставых групах. Узрост таксама ўплываў і на вызначэнне дыстанцый. Бегуны ад 12-ці гадоў да катэгорыі 55 гадоў і старэй, а таксама дзяўчынкі і жанчыны пераадольвалі дыстанцыю 1017 м. Стартаваўшы ад плошчы імя Кірава, яны рухаліся па аднайменнай вуліцы з паваротамі на вуліцы Камсамольскую, Савецкую і Ленінскую і фінішавалі там жа, дзе быў дадзены старт. Юнакі і мужчыны ад 16 да 49 гадоў рабілі большы круг, паварочваючы на вул. Савецкую з вул. Карла Маркса. Працягласць дыстанцыі была сімавлічнай: 2017 м!
Якая ж “Навагодняя міля” без Дзеда Мароза і Снягуркі?!.. Галоўныя навагоднія персанажы шчыра пажадалі ўдзельнікам ўдалых стартаў і фінішаў, а, галоўнае, бадзёрасці і святочнага настрою. І менавіта Дзед Мароз (і гэта таксама традыцыя) даваў стартавую адмашку для ўсіх бегуноў.
Першымі, у суправаджэнні аўтамашыны аддзялення дзяржаўтаінспекцыі РАУС стартавалі самыя юныя ўдзельнікі — хлопчыкі ва ўзросце 12-13 гадоў. Хутчэй за ўсіх дыстанцыю пераадолеў Ілья Несцярэнка з Мышкавіцкай СШ. За ім адпаведна фінішавалі Максім Няйштэтар з Паўлавіч і Ягор Сосаў з Добасны. У такой жа ўзроставай групе сярод дзяўчынак першынствавала прадстаўніца Баравіцкай школы Ксенія Гушчына. Яна змагла абагнаць бліжэйшых канкурэнтак з Паўлавіч Настассю Котаву і Крысціну Лазараву.
Ва ўзроставай групе сярод юнакоў 15-16 гадоў перамогу атрымаў Кірыл Шамедзька з Добасны, другое і трэцяе месцы заваявалі Ілья Сямёнаў са Скрыпліцы і Арцём Несцярэнка з Мышкавіч. У дзяўчат такога ж узросту перамагла яшчэ адна вучаніца Баравіцкай школы Юлія Калістратава. На другім і трэцім месцы аказаліся Надзея Белаглазава з Паўлавіцкай школы і Алена Федаровіч з Жыліч.
Самым хуткім сярод бегуноў 16-17 гадоў аказаўся Сяргей Сосаў з Жыліч. Другі і трэцім прызёрамі сталі адпаведна Сяргей Булах з ліцэя №15 і Раман Швец з Жыліч. Дзве Дар’і з гімназіі — Дямешка і Курбыка — занялі адпаведна першае і другое месцы сярод дзяўчат такога ж узросту. Замкнула прызавую тройку прадстаўніца ліцэя №15 Дзіяна Габрусь.
Імкліва пераадольвалі дыстанцыю мужчыны ва ўзросце ад 18 да 29 гадоў. У напружанай барацьбе перамогу святкаваў Павел Белахвостаў з Мышкавіч. Другі і трэці рэзультаты паказалі адпаведна Васіль Грыневіч з Жыліч і прадстаўнік ДЮСШ Максім Хамічэнка. А вось у жанчын у такой жа ўзроставай катэгорыі барацьбы не атрымалася. Адзінай прадстаўніцы ў забегу Вользе Міхайлюк з Жіліч канкурэнтак не знайшлося…
Зусім не было на старце і жанчын ва ўзроставай катэгорыі ад 30 да 39 гадоў. А вось у мужчын гэтай узроставай катэгорыі зноў атрымаўся напружаны паядынак за першае месца. Дасталося яно ліцэісту Алегу Цітарэнку. Другім фінішаваў Уладзімір Долгі з КСУП “Чырвоны баец”, трэцяе месца заняў Васіль Цітарэнка з Жыліч.
У мужчын ва ўзроставай катэгорыі ад 40 да 49 гадоў пермог Вадзім Курбыка, які прадстаўляў фізкультурна-спартыўны клуб раёна. Андрэй Бяляўскі з Мышкавіч і прадстаўнік УКП “Жылкамгас” Аляксей Пятроўскі занялі адпаведна другое і трэцяе месцы. У гэтай жа катэгорыі сярод жанчын зноў на старт вышла толькі адна аматарка бегу — супрацоўніца раённага Цэнтра гігіены і эпідэміялогіі Наталля Курбыка, якая, як лёгка здагадацца, і стала пераможцай “Навагодняй мілі”. Уважлівы чытач, пэўна, заўважыў, што прозвішча Курбыка тройчы ўпамінаецца сярод пераможцаў і прызёраў. Так, гэта ўсе прадстаўнікі такой вось спартыўнай сям’і — бацька, маці і дачка. Выдатны прыклад для пераймання!
У самай ўзроставай катэгорыі — 55 гадоў і старэй прынялі ўдзел два прадстаўнікі: супрацоўнік раённага Цэнтра сацыяльнага абслугоўвання насельніцтва Генадзь Лагойка і неаднаразовы пераможца “Навагодняй мілі” Мікалай Галавач з ДЮСШ. Апошні з іх у чарговы раз стаў першым на дыстанцыі.
“Разагрэўшыся” на лёгкім марозцы са сняжком, пераадольваючы дыстанцыю, удзельнікаў на фінішы чакалі пачастункі, якія арганізаваў фізкультурна-спартыўны клуб раёна. Усе жадаючыя маглі пагрэцца і падсілкавацца гарачым чаем з пернікамі. А ўсім пераможцам і прызёрам яго старшыня Віктар Бялянаў уручыў прызы, спосарамі якіх сталі раённая арганізаця Федэрацыі прафсаюзаў Рэспублікі Беларусь і райкам прафсаюза работнікаў АПК. А галоўнымі падарункамі для ўсіх удзельнікаў стаў выдатны настрой і значная порцыя бадзёрасці, як таго і жадаў напачатку ім спаборніцтваў Дзед Мароз!
Аляксандр ХАХЛОЎ.
Фота аўтара.
