З надыходам вясны прыходзіць час абнаўлення, калі прырода ажывае, а мы, у сваю чаргу, можам актыўна паўдзельнічаць у паляпшэнні аблічча свайго раёна.
Чысціня і ўтульнасць у нашым доме пачынаюцца з нашых уласных намаганняў. Каб раён выглядаў па-сапраўднаму дагледжаным, кожны з нас павінен унесці сваю лепту ў агульную справу.

Пагадзіцеся, калі выходзіш з дому і бачыш чысціню і парадак, гэта стварае не толькі добры настрой, але і агульнае адчуванне гармоніі і дабрабыту.

Варта памятаць, што наводзіць парадак важна не толькі ў сваім двары, але і ў месцах агульнага карыстання. Далучыўшыся да агульнай справы па
навядзенні парадку, мы не толькі дапамагаем палепшыць аблічча горада, але і ўмацоўваем пачуццё адзінства і адказнасці за нашу агульную прастору, ствараючы атмасферу ўзаемадапамогі і клопату аб тым месцы, дзе жывём. Гэта шанц не толькі зрабіць наш раён прыгажэйшым, але і адчуць сваё дачыненне да важнай справы.
Жыллёва-камунальная служба раёна актыўна працуе па абрэзцы дрэў на вуліцах Кіраўска, выдаленні сухіх і пашкоджаных галінак, а таксама ўборцы смецця на вуліцах і грамадскіх тэрыторыях. Ачыстка ж двароў, вываз смецця, падрэзка дрэў і кустоў – усё гэта задачы, якія пад сілу кожнаму жыхару.

Асаблівую ўвагу трэба надаць воінскім пахаванням. Напярэдадні святаў і ў гонар тых, хто аддаў сваё жыццё за нашу свабоду і незалежнасць, вучні школ прыводзяць у парадак помнікі і воінскія пахаванні. Такія акцыі становяцца сапраўдным урокам патрыятызму і памяці, выхаваннем павагі да гісторыі і подзвігаў нашых продкаў. Да гэтай добрай справы можа далучыцца любы неабыякавы жыхар раёна. Таксама прыбіраючы пахаванні сваякоў, звярніце ўвагу і ачысціце недагледжаныя магілы. Гэтым самым мы не толькі выкажам сваю падзяку і павагу да тых, хто некалі жыў на нашай зямлі, але і ўмацуем сувязі пакаленняў, перадаючы нашчадкам важнасць захавання гэтай памяці. Толькі разам мы зможам утрымліваць гэтыя святыя месцы ў годным выглядзе.
Дарагія землякі! Не заставайцеся абыякавымі, актыўна ўдзельнічайце ў навядзенні парадку ў нашых дварах і тэрыторыях, якія да іх прылягаюць. Бо кожны маленькі ўклад – гэта крок да таго, каб наш раён стаў яшчэ больш прыгожым, чыстым і ўтульным для жыцця. Толькі агульнымі намаганнямі мы зможам стварыць камфортнае і бяспечнае асяроддзе для ўсіх.
Галіна РУСЕЦКАЯ.

Пад крытычным вуглом
Так, шмат працы па навядзенні парадку трэба будзе зрабіць. А яе вынік будзе залежаць ад нашых агульных намаганняў. Галоўнае, каб гэтыя намаганні прыносілі карысць.
Дзіцячыя пляцоўкі зачакаліся сваіх наведвальнікаў. Але вось пляцоўка па вуліцы Карла Маркса, якая толькі ў 2023 годзе была ўведзена ў эксплуатацыю, мае сур’ёзныя пашкоджанні. Яна стала небяспечным месцам для гульняў. Прычына? Відавочная – нядбайнасць і бяздзейнасць, а таксама абыякавасць дарослых, якія не надавалі належнай увагі стану пляцоўкі.
Хутчэй за ўсё, пашкоджанні зробленыя дзецьмі і падлеткамі, якія зрабілі гэта, гуляючы і забаўляючыся. Але гэта не апраўдвае сітуацыю. Важна разумець, што бяспека нашых дзяцей залежыць ад нас, дарослых, і ад таго, як мы сочым за станам грамадскіх тэрыторый.
Гэта наша агульная праблема і яе рашэнне таксама павінна быць агульным. Замест таго, каб чакаць, пакуль хтосьці ўсё выправіць, можна зрабіць гэта самім! А яшчэ лепш – прыцягнуць да гэтай справы дзяцей. Ужо тады яны сапраўды не будуць нічога псаваць і іншым не дадуць…