Нягледзячы на тое, што на двары – студзень, у інжынерных службаў, майстроў­наладчыкаў і механізатараў сельгасарганізацый раёна – гарачая пара: яны займаюцца рамонтам і давядзеннем да ладу сельскагаспадарчай тэхнікі, рыхтуючы яе да веснавых палявых работ.

Як наладжаны гэты працэс у ААТ «Кіраўскае райаграпрамтэхзабеспячэнне», даведаліся журналісты «раёнкі». Аб тым, што работы вядуцца тут поўным ходам, было чутна яшчэ на падыхо­дзе да будынку мехмайстэрні: вакол разносіліся грукат і скрыгат жалеза, свіст абсталявання для рэзкі металу, а, адчыніўшы дзверы, убачылі яркія сполыхі ад работы спецыяліста на газаэлектразварачным апараце.

У РАПТЗ будынак мехмайстэрні, напэўна, адзін з самых вялікіх сярод іншых сельгасарганізацый раёна. У дзень наведвання на рамонце тут знаходзілася адначасова каля 10 адзінак розных агрэгатаў, трактар і камбайн.

Больш падрабязна аб ходзе правядзення рамонтных работ расказаў галоўны механік Святаслаў Русецкі.

Так, да рамонту тэхнікі ў сельгаставарстве прыступілі ў адпаведнасці з маючыміся планамі галаўнога прадпрыемства і РАПТЗ. Усе дастаўленыя на машынныя двары агрэгаты і механізмы былі старанна ачышчаны і памыты. Правялі іх дэфектоўку, вызначылі аб’ёмы работ і ліміты затрат на рамонтныя работы.

Першымі на мехмайстэрню паступілі плугі. Наяўнасць запасных частак дазволіла ў кароткі час усе шэсць адзінак адрамантаваць і паставіць на лінейку гатоўнасці. Затым надышла чарга чатырох глебаапрацоўчых агрэгатаў. Праз непрацяглы час і яны мелі 100%­ю гатоўнасць. У рабоце зараз дыскатар і сеялка «рабэ». Менавіта ўсе гэтыя агрэгаты з пачаткам веснавых палявых работ будуць запатрабаваны ў першую чаргу. А таму, нават калі на палеткі давядзецца выехаць ужо ў лютым – падобнае з­за цёплага надвор’я было некалькі год таму – мясцовыя механізатары да гэтага гатовы.

Увогуле, адзначыў Святаслаў Сцяпанавіч, усе рамонтныя работы ў РАПТЗ вядуць такім  чынам, каб не здаралася ніводнага дня прастою. Ёсць запасныя часткі на той ці іншы агрэгат, з ім і працуюць. Гэта дазваляе рамантаваць тэхніку з апярэджаннем графіка.

Напрыклад, механізатар Валянцін Сулімскі ўжо падрыхтаваў замацаваны за ім кормаўборачны камбайн КВК, які выедзе на палеткі дзесьці ў маі­чэрвені. Падобны падыход можна без перабольшвання назваць гаспадарскім: прыйдзе час, і аграрыі без прамаруджвання пачнуць рабіць кармавы запас для грамадскага статка. Дарэчы, на лінейцы гатоўнасці яшчэ адзін кормакамбайн.

Не сакрэт, што любая тэхніка будзе добра працаваць без значных паломак толькі калі адносіцца да яе выкарыстання з увагай і клопатам. У гэтым сэнсе ў РАПТЗ, можна сказаць, поўны парадак: мяркуйце самі, з 34 трактароў толькі 6 знаходзяцца ў рамонце, а гэта значыць, што механізатары, замацаваныя за тэхнікай, не толькі акуратна на ёй працавалі на палетках, але і своечасова абслугоўвалі, даглядалі сваіх сталёвых канёў. У выйгрышы ў канчатковым выніку застаюцца ўсе: сельгаставарыства не нясе дадатковых страт на рамонты і запчасткі, своечасова вядуцца палявыя работы, а земляробы працуюць без прастояў з дастойнымі заробкамі.

Калі наша размова зайшла пра кадры, якія займаюцца рамонтнымі работамі, Святаслаў Русецкі адзначыў, што з такімі спецыялістамі ім многае па сілах. За плячыма большасці работнікаў – не адзін дзясятак год добрасумленнай працы. Кожны да падрыхтоўцы тэхнікі падыходзіць адказна. Па яго словах, ніводнага не трэба кантраляваць, бо ўпэненасць у тым, што ўсё даручанае будзе зроблена дакладна і якасна, – стопрацэнтная.

Па словах галоўнага механіка, механізатарскае звяно, якое налічвае 24 чалавекі, у іх дружнае і надзейнае. Нават падрыхтоўку і рамонт тэхнікі вядуць разам: удвух­утрох бяруць у работу трактар ці агрэгат і працуюць з ім, пакуль поўнасцю не давядуць да ладу. Такім чынам, рамонт вядзецца хутчэй, а агульная адказнасць спрыяе яго якасці.

Напрыклад, Уладзімір Шалянгоўскі з памочнікамі займаецца рамонтам дыскарата, Сяргей Комар рамантуе кормападборшчык, Андрэй Слуцкі і Валянцін Сулімскі – жаткі для камбайнаў, Дзмітрый Комар займаецца камбайнам для ўборкі цукровых буракоў «Холмер». Рыхтуюць агрэгаты Сяргей Зазерскі і Аляксандр Тылінскі. Дапамагаюць земляробам 4 слесары, сярод вопытных – Сяргей Капуста і Андрэй Кісель.

Ніводны рамонт тэхнікі не праходзіць без дапамогі токара Анатоля Стальмакова і слесара дылерскага цэнтра Аляксандра Нарэзенкі. Як адзначыў Святаслаў Русецкі, гэтыя людзі – сапраўдны «залаты фонд» сельгаставарыства. Не сакрэт, што запасныя часткі зараз нятанныя, а свабоднымі грашовымі сродкамі многія сельгасарганізацыі не валодаюць, вось тут і прыходзяць на дапамогу такія высокакласныя спецыялісты. Напрыклад, Анатоль Стальмакоў можа вытачыць практычна любую дэталь, зэканоміўшы РАПТЗ не адну сотню рублёў. Аляксандр Нарэзенка здольны справіцца нават з самай складанай паломкай тэхнікі, знойдзе і ўхіліць праблемы з электрыкай. Пасля праведзеных ім дыягностыкі і рамонту можна быць поўнасцю ўпэўненым, што падчас палявых работ тэхніка не падвядзе.

Практычна ніводны рамонт не абыходзіцца без электрагазазваршчыка. На дапамогу механізатарам прыходзіць Уладзімір Свірко. Святаслаў Русецкі з усмешкай адзначыў, што звараны спецыялістам метал зламаць практычна нельга, часцей лопаецца ў іншым месцы.

Работы па рамонце тэхнікі ў РАПТЗ ідуць зладжана і без збояў. А гэта адна з гарантый таго, што вясенне­палявыя работы мясцовыя аграрыі правядуць у сціслыя тэрміны і пры высокай якасці.

Людміла СЯМЁНАВА.

Фота Максіма МІКЕШЫНА.