Першынство раёна па спартыўным арыентаванні, прымеркаванае да Сусветнага дня турызму, прайшло ў маляўнічым ландшафтна-гідралагічным заказніку “Дубовы гай” на Белым беразе. Адметна, што ў сёлетніх спаборніцтвах прынялі ўдзел не толькі школьнікі, а і каманды дарослых.
Прадстаўнікам 10-ці каманд са школ раёна неабходна было прайсці па пэўным маршруце і знайсці замаскіраваныя пікеты. У асабістым першынстве лепшыя вынікі паказалі: ва ўзроставай катэгорыі да 12 гадоў — Кірыл Плюцінскі з Чыгірынскай школы і Крысціна Акуліч з гімназіі Кіраўска; сярод рабят 13-14 гадоў — Дзмітрый Піменаў з Паўлавіч і Кацярына Бондарава з Жыліч; паміж 15-16-гадовымі рабятамі не было роўных прадстаўнікам з Пацавай Слабады Уладзіміру Шацілу і Настассі Казека.
Наогул пацава-слабадчане выступілі выдатна і ў камандным заліку, уступіўшы толькі пераможцам — камандзе Паўлавіцкай СШ, якая зноў пацвердзіла сваё рэнамэ лепшай турысцкай каманды раёна. Трэцяе месца занялі прадстаўнікі СШ №1 райцэнтра.
На жаль, нешматлікім было прадстаўніцтва каманд з арганізацый і ўстаноў раёна. Перамога дасталася турыстам з ДЮСШ, другое і трэцяе месцы адпаведна занялі зборныя СВК “Рассвет” імя К.П.Арлоўскага і аддзела адукацыі райвыканкама.
Спартыўнае арыентаванне — не адзінае, чым на сваю карысць займаліся ў гэты дзень прыехаўшыя прадстаўнікі каманд. Былі і песні каля кастра, і гарачыя шашлыкі, і рухомыя гульні — адпачынак прайшоў на славу. Хацелася б толькі, каб і іншыя, хто ў гэты раз не трапіў на такога роду спаборніцтвы, на наступны год далучыліся да сёлетніх каманд. Шкадаваць і сумаваць не давядзецца…
Максім РУСАНАЎ, кіраўнік турыстычнай секцыі ДЮСШ.