Перад аграрыямі раёна пастаўлена важная задача – своечасова адрамантаваць і падрыхтаваць тэхніку да правядзення палявых сельгасработ.
Як адзначыў начальнік аддзела інтэнсіфікацыі вытворчасці ўпраўлення па сельскай гаспадарцы і харчаванні райвыканкама Дзмітрый Іваніцкі, для таго, каб забяспечыць своечасовую падрыхтоўку машынна-трактарных паркаў да палявых работ 2025 года, ва ўпраўленні зацверджана раённая праграма рамонту сельскагаспадарчай тэхнікі. У гаспадарках назначаны адказныя за пастаноўку тэхнікі на захоўванне і рамонт, навядзенне парадку ў памяшканнях і на тэрыторыі мехдвароў. Створаны звенні па рамонце, у склад якіх увайшлі слесары, токары, газазваршчыкі і механізатары. Зацверджаны расцэнкі па аплаце працы падчас правядзення рамонтных работ, графікі пастаноўкі тэхнікі на лінейку гатоўнасці, склад камісій па яе прыёмцы.
Згодна графіка аграрыі раёна павінны да 1 сакавіка падрыхтаваць тэхніку, якая будзе задзейнічана на веснавых палявых работах, да 1 красавіка – на нарыхтоўцы кармоў, да 1 мая – падчас уборкі збожжавых і зернебабовых культур, да 1 верасня – на ўборцы цукровых буракоў.
На належным узроўні вядуцца работы па рамонце тэхнікі ў ААТ “Кіраўскае райаграпрамтэхзабеспячэнне” і СГФ “Чыгірынка” РУП “Беларуснафта-Магілёўаблнафтапрадукт”, у КСУП “Ніва-Барсукі”, КСУП “Жылічы”, СВК “Бераснёўскі” і іншых сельгасарганізацыях.

Каб веснавая пасяўная кампанія прайшла зла­джана, у тэхналагічна вызначаныя тэрміны, працаўнікі ААТ “Кіраўскае райаграпрамтэхзабеспячэнне” яшчэ з восені, як толькі тэхніка вызвалялася ад палявых работ, пачыналі яе рамонт. Так, плугі адрамантавалі яшчэ ў лістападзе. Трэба сказаць, што тут заўсёды адказна падыходзяць да захаванасці і эксплуатацыі сельскагаспадарчай тэхнікі. Сведчаннем таму – штогадовыя перамогі падчас правядзення раённага агляду-конкурсу па добраўпарадкаванні машынных двароў і гатоўнасці рамонтна-абслугоўваючай базы сельгасарганізацый да работы ў зімовых умовах, падрыхтоўцы машынна-трактарнага парка да веснавых палявых работ, а таксама пастаноўцы на захоўванне адпрацаваўшай сезон тэхнікі.
– Час бяжыць хутка, не паспееш азірнуцца – прыдуць гарачыя дні пасяўной кампаніі, – адзначыў галоўны механік райаграпрамтэхзабеспячэння Святаслаў Русецкі. – Таму, не марудзячы часу займаемся рамонтам і падрыхтоўкай трактароў, сельскагаспадарчых вузлоў і агрэгатаў да веснавых палявых работ. Дарэчы, уся глебаапрацоўваючая тэхніка ўжо гатова да работы. Перыяд падрыхтоўкі тэхнікі – самы адказны і важны этап у рабоце, бо ад яе спраўнасці залежаць у тым ліку захаванне агранамічных тэрмінаў, якасць пасеваў, ураджайнасць сельгаскультур. Аператыўна рыхтуюцца тыя агрэгаты, на якія ў сельгаспрадпрыемства ёсць у наяўнасці запасныя часткі. Астатняе заказваем, рамантуем і ставім на лінейку гатоўнасці.
Як адзначыў Святаслаў Русецкі, магчымасцей і спецыялістаў для правядзення рамонту тэхнікі ў належныя тэрміны ў іх дастаткова. Кіраўніцтва РАПТЗ аператыўна набывае неабходныя запасныя часткі, таму рамотныя работы разгорнуты на поўную магутнасць. Адметна, што мясцовыя ўмельцы самі асвоілі выпуск некаторых неабходных дэталяў. А гэта не толькі скарачае час рамонту, але і значна эканоміць грашовыя сродкі.
Дзякуючы таму, што механізатары адказна і з увагай ставяцца да тэхнікі падчас правядзення палявых работ, ёсць у таварыстве сельгасмашыны, якія не патрабуюць рамонту, а толькі тэхнічнага абслугоўвання і замены расходных матэрыялаў.
Рамонт тэхнікі вядзецца ў майстэрні агульнага прызначэння. Кожны дзень механізатарскае звяно займаецца рамотнам і наладкай трактароў і агрэгатаў. Па словах Святаслава Сцяпанавіча, механізатары абавязкова ўдзельнічаюць у рамонтных работах, бо хто, як не яны, дасканала ведаюць праблемы і слабыя месцы сваіх “сталёвых коней”. Да таго ж, трактарысты берагуць сваю тэхніку падчас палявых работ, даглядаюць яе, з асаблівай адказнасцю ставяцца да рамонту, каб яна працавала без значных паломак. Большасць паломак – гэта працоўныя вузлы машыны. Мяняюцца толькі запчасткі, якія цалкам непрыдатныя да дальнейшай працы, астатнія – аднаўляюць.
Работы вядуцца аператыўна: заганяюць трактар ці агрэгат у майстэрню, разам яго рамантуюць, потым – наступны ідзе ў работу. Як адзначыў спецыяліст, уся праца зараз будуецца на ўзаемаразуменні: адказ­насць па падрыхтоўцы парка машын разумеюць усе – ад кіраўніка да механізатара. Граматныя і вопытныя спецыялісты сёння на вагу золата, надаецца ўвага і маладым кадрам, якія жадаюць вучыцца і працаваць.
Паралельна з правядзеннем рамонту ўласнай тэхнікі, працаўнікі райаграпрамтэхзабеспячэння займаюцца рамонтам тэхнікі і агрэгатаў гаспадарак суседніх раёнаў.
Па словах Святаслава Русецкага, для механізатараў, якія задзейнічаны на рамонце тэхнікі, створаны належныя ўмовы: вялізная майстэрня, у якую можна заганяць любую тэхніку, пакой для адпачынку і прыёму ежы, душавыя.
Не сакрэт, што любая справа спорыцца, калі выконваюць яе сапраўдныя прафесіяналы, людзі, якія душой хварэюць за яе. У райаграпрамтэхзабеспячэнні большасць працаўнікоў правераны часам, за іх плячамі – не адзін дзясятак гадоў адказнай і добрасумленнай працы. Сярод іх – механізатары Уладзімір і Дзмітрый Комары, Уладзімір Сакалоўскі, Уладзімір Шэлянгоўскі, Пётр Дрозд і многія іншыя, токар Анатоль Стальмакоў, электрагазазваршчык Уладзімір Свірко, слесар Аляксандр Арцёмаў і многія іншыя.
У РАПТЗ упэўнены, што ўся неабходная сельгас­тэхніка будзе пастаўлена на лінейку гатоўнасці ў вызначаныя тэрміны і нават з апярэджаннем графіка. Застаецца толькі дачакацца пары і вывесці трактары і агрэгаты на палеткі, каб даць старт веснавой палявой кампаніі-2025.
Людміла СЯМЁНАВА.
Фота аўтара.