У КСУП «Чырвоны баец» адбыўся ўрачысты сход па падвядзенні вынікаў работы калектыву за 2024 год. Удзел у ім прынялі галоўны спецыяліст аддзела эканомікі ўпраўлення па сельскай гаспадарцы і харчаванні райвыканкама Уладзімір Савіч і галоўны бухгалтар раённай прафсаюзнай арганізацыі работнікаў АПК Ларыса Ярковіч.

Дырэктар КСУП «Чырвоны баец» Сяргей Лянкевіч агучыў вынікі працы сельгаспрадпрыемства за мінулы год. Ёсць пэўныя поспехі, аднак калектыву не ўдалося цалкам дасягнуць пастаўленых мэт.
Зыходзячы з аналізу асноўных паказчыкаў, вытворчасць валавой прадукцыі склала 16 млн 854 тыс. рублёў, што на 4,4% перавышае ўзровень папярэдняга года. Аднак план выкананы не поўнасцю.
Пагалоўе буйной рагатай жывёлы павялічылася да 3303 галоў (+48), з якіх 1222 – дойны статак (+82). Вытворчасць малака дасягнула адзнакі ў 8178,4 т – на 783,6 т больш, чым годам раней. Сярэдні надой на адну карову – 6753,4 кг. Вытворчасць мяса склала 521 тону (96,8% да плана). Зменшылася сярэднясутачнае прыбаўленне ў вазе буйной рагатай жывёлы: 611 г супраць 644 г у 2023 годзе.
Вытворчасць валавой прадукцыі ў сферы раслінаводства – 6 млн 277 тыс. рублёў, тэмп росту – 98,5%. Нягледзячы на павелічэнне аб’ёмаў збору збожжавых культур і цукровых буракоў, прадпрыемства не змагло дасягнуць планавага ўзроўню па збожжавых культурах, недаатрымаўшы каля 1300 тон.
Нягледзячы на пэўныя праблемы, калектыў адрозніваецца зладжанай працай. У мінулым годзе была часткова абноўлена матэрыяльна-тэхнічная база гаспадаркі: набыты новыя трактары, абсталяванне для ўнясення ўгнаенняў і апрацоўкі глебы, што дасць магчымасць павысіць эфектыўнасць сельскагаспадарчай вытворчасці ў будучым.
Асаблівая ўвага надавалася падрыхтоўцы тэхнікі да палявых работ і своечасоваму правядзенню пасяўных кампаній.
Здадзена ў эксплуатацыю сянажная траншэя ёмістасцю 2000 т. Пачата будаўніцтва на МТФ «Старыя Дваранінавічы» дапаможнага памяшкання на 200 галоў для расстаноўкі жывёлы.
Па выніках работы сельгасарганізацый раёна за 2024 год КСУП «Чырвоны баец» заняў трэцяе месца па вытворчасці малака і па зборы збожжавых і зернебабовых культур.
Сяргей Лянкевіч падкрэсліў важнасць павышэння эканамічнай эфектыўнасці і рэнтабельнасці прадпрыемства. Кіраўніцтва ставіць за мэту далейшае развіццё вытворчых працэсаў і паляпшэнне фінансавых паказчыкаў. Калектыў настроены на выкананне новых задач і дасягненне высокіх вынікаў.
Уладзімір Савіч звярнуўся да працаўнікоў сельгасвытворчасці з заклікам узмацніць работу па вытворчасці мяса-малочнай прадукцыі, што станоўча адаб’ецца на агульным дабрабыце гаспадаркі і ўзроўні заработнай платы.
Такім чынам, хоць па выніках 2024 года не дасягнуты ўсе намечаныя мэты, кіраўніцтва і калектыў бачаць перспектывы для далейшага развіцця і гатовы мабілізаваць сілы для выканання задач, якія стаяць перад прадпрыемствам у новым годзе.
Шэраг добрасумленных працаўнікоў быў узнагароджаны Ганаровымі граматамі і Падзячнымі пісьмамі ўпраўлення па сельскай гаспадарцы і харчаванні райвыканкама, райкама прафсаюза работнікаў АПК, дырэкцыі і прафсаюзнай арганізацыі КСУП «Чырвоны баец».

Яўгенія БЯЛЬКО.
Фота аўтара.