На базе ААТ “Кіраўскае райаграпрамтэхзабеспячэнне” адбылася чарговая раённая выязная нарада па пытаннях работы жывёлагадоўчай галіны ў студзені – лютым бягучага года з удзелам старшыні райвыканкама Галіны Слабоднікавай, прадстаўнікоў райсельгасхарчу, ветэрынарнай і племянной служб, кіраўнікоў, галоўных заатэхнікаў і галоўных ветурачоў сельгасарганізацый.

Тэмамі размовы сталі арганізацыя вытворчасці малака, недапушчэнне зніжэнняў надояў і прываг БРЖ. На парадак дня былі таксама вынесены пытанні, якія тычацца павелічэння пагалоўя грамадскага статка, вырошчвання і захаванасці маладняку, узнаўлення жывёлы і атрымання прыплоду. Закранулі і пытанне аплаты працы спецыялістаў і работнікаў пры выкананні планавых паказчыкаў.
Пачынаючы нараду, першы намеснік старшыні райвыканкама – начальнік райсельгасхарчу Аляксандр Кісялёў адзначыў, што для таго, каб мець дастойныя вынікі работы жывёлагадоўчай галіны, сельгасарганізацыям неабходна ісці па шляху зніжэння затрат на вытворчасць прадукцыі дзеля павышэння яе канкурэнта-
здольнасці. Эфектыўнасць у значнай ступені залежыць і ад атрыманага прыплоду, і ад яго захаванасці. За кошт строгага захавання тэхналагічнага працэсу ўзнаўлення статка і вырошчвання маладняку можна на 20-30% павялічыць аб’ёмы вытворчасці прадукцыі. На жаль, адзначыў начальнік райсельгасхарчу, у жывёлагадоўлі іншы раз дапускаюцца парушэнні тэхналогій, што адбіваецца на канчатковых выніках.

Ахарактарызаваў работу жывёлаводаў і спецыялістаў сельгасарганізацый намеснік начальніка райсельгасхарчу па жывёлагадоўлі Іван Грышчанка. Ён адзначыў, што з пачатку года валавая вытворчасць малака па раёне склала 44233,2 т (107,5% да адпаведнага ўзроўню 2022 г.). Па рэалізацыі малака станоўча спрацавалі жывёлаводы ААТ “Рассвет імя К.П.Арлоўскага” (120%), КСУП “Чырвоны баец” (116,3%), КСУП “Ніва-Барсукі” (113,1%), КСУП “Барчыцы-агра” (111,6%). Па выніках двух месяцаў дапусцілі зніжэнне рэалізацыі малака СВК “Бераснёўскі”, РАПТЗ і ААТ “Дабаснянскае”. Галіна Слабоднікава даручыла кіраўнікам гэтых арганізацый тэрмінова выправіць сітуацыю.
Дэталёва абмеркавалі такі важны паказчык як таварнасць малака. Практычна ўсе сельгасарганізацыі спрацавалі “з плюсам”, акрамя РАПТЗ і “Бераснёўскага”. У КСУП “Чырвоны баец” у лютым таварнасць малака склала 95%.

Крыху недапрацавалі жывёлаводы раёна і па павышэнні ўдою малака на карову. Больш леташняга дояць пакуль толькі ў трох гаспадарках: “Рассвеце”, “Чырвоным байцы” і “Ніва-Барсукі”.
Звяртаючыся да прысутных, Іван Грышчанка засяродзіў увагу на тым, што з пункту гледжання эканомікі для гаспадарак раёна вельмі важным з’яўляецца колькасць і якасць малака, якое паступае на перапрацоўчае прадпрыемства.

Галіна Слабоднікава спыніла ўвагу на кантролі за работай племянной службы, якая з’яўляецца асновай жывёлагадоўлі, бо малако – гэта сённяшні дзень і будучае АПК. Менавіта недапрацоўкі ў аднаўленні грамадскага статка могуць стаць адной з прычын зніжэння вытворчасці малака.
Як заўважыў намеснік начальніка райсельгасхарчу, многія гаспадаркі змаглі б спрацаваць з лепшымі вынікамі, але з-за пэўнай нядбайнасці ў рабоце гэтага не адбылося, і асноўнае, што найбольшым чынам паўплывала на недаатрыманне прадукцыі, – незахаванне ў поўнай меры элементарнай тэхналагічнай дысцыпліны.

Належную ўвагу, па словах Івана Леанідавіча, неабходна звяртаць на тэхналогію кармлення маладняку БРЖ. У абавязковым парадку трэба займацца выпойваннем цялят малодзівам, для чаго на МТФ павінны быць зонды і іх трэба выкарыстоў-
ваць. Рацыён цялят – грануляваныя камбікармы прамысловай вытворчасці, яны – не танныя, але даюць належны эканамічны эфект. Выкананне гэтых простых правіл дазволіць захаваць пагалоўе і атрымаць у далейшым здаровую жывёлу.

У сваім выступленні спецыяліст райсельгасхарчу акрэсліў шмат іншых надзённых пытанняў жывёлагадоўчай галіны, такіх, як збалансаванае кармленне жывёлы, раздой навацельных кароў, захаванасць маладняку, таварнасць і якасць малака і іншыя.
Дэталёва разбіралася сітуацыя па кожным сельгаспрадпрыемстве, адзначаліся поспехі, высвятляліся прычыны недахопаў і пралікаў, давалася ацэнка рабоце прадстаўнікоў заатэхнічнай і ветэрынарнай службаў, абмяркоўваліся праблемныя пытанні і шляхі іх вырашэння.
На практычнай частцы раённай выязной нарады, якая прайшла на базе МТК “Пацава Слабада” ААТ “Кіраўскае райаграпрамтэхзабеспячэнне”, абмяркоўваліся пытанні лячэння маладняку БРЖ, утрымання і кармлення цялят, што садзейнічае іх захаванасці, магчымасці ў будучым атрымаць высокаўдойных кароў.
Спецыялісты гаспадарак раёна задавалі хвалюючыя іх пытанні, на якія тут жа атрымлівалі кампетэнтныя адказы.
Людміла СЯМЁНАВА.
Фота Максіма МІКЕШЫНА.